عمار يا مصر عمار يا مصريعني ايه"عمار يا مصر"؟كلمة بيرددها دايما اللي برة مصر وعمري ماسمعتها والا قولتها جوا مصر, ودة اكيد عشان الحالة الاقتصادية المنتعشة جدا جدا داخل المحروسة
معنى كلمة"عمار" يعني خير, يعني المقصود بعمار يا مصر إن مصر بلد الخير وهي كدة بالفعل-بغض النظر عن حاجات كتييييييير اغلبنا عارفها كويس- مليانه بالخير والحب وبجد معرفتش المعنى دة غير لما بعدت عنها,يمكن اكون انا عاطفية شويتين ثلاثة إلا اني حتكلم معاكم بالادلة.
1-بما اننا شعب اكول وبنفهم فكل انواع الاكل ودي اكتر حاجة فالحين فيها فنبتدي بالاكل؛خضار مصر وفاكتها بالرغم من التلوث والمبيدات الحشرية-ليها طعم مميز مفيش مقارنة بينه وبين الفاكهة والخضار او حتى اللحوم البيضا والحمرا في اي بلد تانية,انا طبعا مرحتش غير بلد واحدة(قطر) إلا ان هنا بيستوردوا كل اكلهم تقريبا فمثلا تلاقي الخيار من السعودية والفلفل من المغرب والكوسة من الهند او باكستان ومالاقوش حاجة يستوردوها من مصر غير البتنجان. وعشان كدة انا بتكلم بصيغة الجمع,نسيت اقولكم ان هنا في نقص شديد جدا فالتوابل وغيرها من الحاجات الكتير اللي مفيش غنى عنها فالسفرة المصرية.......... نقول ايه بقى.... عمار يا مصر
2- احنا فمصر كلنا فاهمين بعض يعني عمرك مادخلت سوبر ماركت ورحت تتكلم مع اي حد لاقيته بيتكلم بلغة ثانية او حتى لهجة ثانية انت مش فاهمها؛هنا الدولة تقريبا محتلة بالاجانب عدد القطرين قليل جدا ميجيش ثمن عدد سكان القاهرة!!!! المهم ان اغلب الناس هنا من باكستان وهند وافغنستان يعني مش بعيد الاقي هنا "بنلادن", لما تدخل محل حتلاقي الناس نفسها مش فاهمه بعض والا حتى فاهمين عربي ولا انجليزي والا اي حاجة................ مش قلتلكم عمار يا مصر.
3-بالرغم من انتشار المعاكسات فمصر وان اخلاق شبابنا- البعض وليس الكل طبعا- زي الفل طبعا... الا ان حتلاقي ولو بنسبة بسيطة حد بيتكسف يعاكس بنت حتته او يعاكس بنت ماشية مع ابوها او حد من قرايبها ان ماكنش احترام اهو خوف المهم انه مابيعملش كدة انم هنا معنديش كلام اقوله غير ربنا ما يوريكم اللي انا فيه.............عمااااااااااار يا مصر
4- زمان فالمدرسة كانوا دايما يدونا فدروس التاريخ ان " مصر هبة النيل" وعمري مافهمت قيمة الكلمة دي الا هنا ودة والله من غير مبالغة هنا ماية الحنفية مينفعش تتشرب او يتعمل بيها اي حاجة خالص لازم تجيب ماية معدنية للشرب والطبيخ وكل استخدماتك تقريبا... فعلا معاناه وعشان كدة لاقتني بقول من غير تفكير عماااااااااااااااااار يا مصر
5-هنا مستوى المعيشة نار يا حبيبي نار على رأي حليم.....بالرغم من ان الاسعار فمصر غالية جدا جدا بالنسبة لمستوى دخل المواطن الا ان في حاجات اسعارها موحدة او على الاقل فنفس المنطفة سعر الحاجة واحد يعني مثلا ثمن كيلو الجبنة واحد عند عم جرجس وعم محمد,انما هنا فالوضع مختلف تماما الحاجة فكل مكان بسعر دة مش بس كدة دة انت ممكن تجيب نفس الحاجة من نفس المحل في نفس اليوم بسعر مختلف!!!!! عمار يا مصر
5-هنا في نهضة معمارية رهيبة مهما قلت مش حعرف اوصفها اقل حاجة ممكن اشبهلكم بيها الامر ان هنا بينوا بين كل بناية(عمارة) وبناية بناية ومشفوتش لغاية دلوفتي مسجد واحد بيتبني,دة في مناطق سكنية كاملة مفيهاش مسجد زي منطقة الفنادق(اصل هنا البلد متقسمة مناطق؛منطقة فنادق,منطقة الكهربا,منطقة التليفونات ...وهكذا) فضلت حوالي اسبوع او اكتر مش بسمع والا اذان تخيلوااااا......عمار يا مصر
6-المواصلات ازمة فظيعة فمصر بس تخيلوا معايا كدة لو في بلد مفيهاش مواصلات عامة!!!!! يعني اللي معهوش عربية احسن له مينزلش من بيتهم؛مفيش هنا وسائل مواصلات عامة الا نادرا جداااااااااا ومينفعش تماما تستخدم رجلك(الدنيا هنا ولعة) هو اي نعم فمصر بنبقى شبة علب السردين بس برضة الفقير ينفع يركب.....عمار يا مصر
7-في اغنية قديمة لمنيرة المهدية اسمها "بعد العشا" ودة طبعا لاننا بنعشق السهر والفرفشة لو نزلت في اي وقت حتلاقي بني ادمين انما هنا البلد تقريبا بتقفل بعد العشا(8 م) واقصى محل بيفضل فاتخ ل 10 ولو طول بيبقى 12 يعني من الاخر بعد 12 ترمي الابرة ترن......عمار يا مصر
كل ماحاول اختم افتكر حاجة جديدة ا عايزة اضيفها وعشان كدة مش لاقية كلام مناسب اختم بيه غير اغنية"شيرين" :يمكن ناسي لأنك فيها مش وحشاك ولا غبت عليها بس اللي مجرب وفارقها قال في الدنيا مفيش زيها
يمكن يخطر على بال حد اني مفتكرتش غير الحاجات اللي مش مهمة وان عليها تحفظات بس بجد اللي حيجرب يعيش من غير الحاجات دي فعلا حيلاقيها صعبة اوي وبعدين يمكن من هنا نقدر نبتدي صفحة جديدةش

هناك 3 تعليقات:

,واحد نفسه يتغير يقول...

بصراحه مش عرف اقول ايه.....طبعا هي جامده جدايا هيه ....ولو اني طبعا مش هحس ده غير لما اجربه....بس مكنش متوقع منك اقل منم كده....ربنا يحيبك بالسلامه يس سؤال اخير....عندهم كشري هناك؟؟؟؟؟؟؟؟؟؟؟؟؟؟؟؟؟؟

لست كغيرى يقول...

انا لما قريت المقال دا قبل كدا ماكنتش عارفة ان انتى اللى كاتباه خالص وحسيت ساعتها بفرحة كبيررة او ممكن تقولى شماتة بس اعوذ بالله منها بان بلدنا احسن من البلاد العربية مش زى ماا كل الناس بتقول وانا طبعا مش سافرت قبل كدا بس انا بثق فى رايك دا جداااااااا وطبعا اسلوبك كالعادة خارج من قلبك .وصحيح لو ماعندهمش كشرى انتى عايشة ازاى؟

لست كغيرى يقول...

صحيح نسيت اقولك اهم حاجة عمار يامصر طول مافيها شباب وبنات بيحبوا الناس وبلدهم زيك تمام