عن شبابة فيما ابلاه

في يوم من الايام....صحيت من الاحلام.....بصيت لحظة فمرايتي.....وظهرت ليا حقيقتي.....لقيت وش عجوز....صرخت وقلت كابوس.......دة يوم مفيهوش هروب على الجبين مكتوب......الشباب مهما طال....مسيرة يوم ينقضي.....العجز في الانتظار......والحكاية بتبتدي

عملت ايه يا ترى.......ضاع شبابك في ايه؟......حتقول فات ومضى والا حتفرح بيه.......اسمعلك كلمتين....يمكن ينفعوك.....شبابك مش هزار دة امل امك وابوك........قالوا فيك نشوف فرح معيشنهوش.....تنجح ونجاحك يغطي الشمس وقت الكسوف

شبابك مسئولية......حتعمل قيها ايه؟...حتقضيها نوم والا حتفرح بية؟.....دة انت فيوم القيامة حتتحاسب علية

هناك 6 تعليقات:

لست كغيرى يقول...

من اقصر المواضيع اللى قريتها ....لكنها من اعظم المواضيع فى رسالتها
صحيح خير الكلام ماقل ودل.

بدايه...الصورة اللى حطاها معبرة جدااااا...بجد حلوة اوى

عارفة ياهبه....فى نظرة مابقدرش احتملها ابدا....لما ابص لنفسى فى المرايه وعينى تيجى فى عينى....ونبتدى ندى لبعض نظرات...لما بكون مبسوطة من نفسى ومن حاجة عملتها...احب اوى اشوف الفرحة فى عينى
والعكس...لما بكون حزينة او عامله حاجة غلط وبهرب منها... وانا ببص لنفسى ....فى اللحظة دى بحس ان ضميرى بيتجسد فيا على هيئة صورتى فى مرايتى

بس بحمد ربنا ان لحظات العتاب والمواجهة دى مش بتكون كتير...ودا لانى بحاول على قد مااقدر اعمل برسالتك دى....مش عايزة اضيع شبابى هدر....ويمكن من اغلب المواجهات اللى بتحصلى هى لو بعدت عن هدفى داوانشغلت باى حاجة تبعدنى عنه...وبجد بتكون فترة عصيبه جدااااا

بس كل واحد بيفرح بشبابه من منظوره هو....يعنى اللى بيقضيه فى معصيه ولعب وكلام فاضى...هو مستمتع بيه وفرحان ....واللى مقضيه قافل على نفسه ...محلك سر ...مجرد مستقبل لاى حاجة...بردو فرحان من وجهه نظره...واللى زينا بيحاول يستثمره ويخطط ويتعب نفسه لانه عارف انوا لو ماتعبش فى شبابه هيتعب باقى عمره...بردوا فرحان

فى جميع الاحوال كل الناس بتستمتع بشبابها....بس النوع الاخير واللى اتمنى نحافظ عليه فينا ويزيد فى كل يوم عن اللى قبله فينا وفى غيرنا كتير...النوع دا بيستمتع بشبابه فى الدنيا بالكفاح والمثابرة والانجاز....وهيستمتع بيه فى الاخرة بالمجازاة بالجنة والصحبه الكريمة ولقاء الله عز وجل ان شاء لله....وهى دى لذة الاستمتاع والفرحة الحقيقية
اما الباقى ربنا يهديهم....ويفرحهم بنوع تانى من الاستمتاع بالشباب....لان اللى هما فيه استمتاع دنيوى فقط

كفايه كدا اوى...انا رغيت كتير...بس عشان موضوعك جميل

اكتر حاجة تثبت تميزك....انك كاتبه كل حاجة فى اسطر قليله جدا...ولو حد تانى هيكتب بس رد ع الموضوع هيرغى اكتر بكتير....ودا يدل على بلاغتك وايجازك الجميل..فى مرة قريت قول ماثور لاحد اكبار الشعراء بتقول ان بلاغه الشعر هى انه لما حد يقراه يفتكر انه يقدر يكتب زيه ....ولما يحاول يكتب يكتشف فشله...ودا اللى بيحصل معاكى
ابدعى اكتر واكتر يازيتونتى....وربنا يكرمك ويكرمنا بشبابنا

Psycho Hanem يقول...

عن شبابه فيما أبلاه
.............
أول حاجة وقعت عليها عيني هي الصورة إللي إنتي حاطاها مع الموضوع ....
مش عارفة ليه لأول وهلة حسيت إن اللي في الصورة بتضحك .. وبعدين لما ركزت فيها حسيت بحزن عمييق جواها.... مع بساطتها ومع إنها صورة لباربي يعني....
............
زي موضوعك تمااام
لأول وهلة تحسي إنهم كام سطر صغننين ... وهوبا خلصوا بسرعة وإنهم عاديين ...
لكن مع تركيز شوية .. تحسي أد إيه عمق الكلمات ... وإختراقها للعقل والقلب ......

زي ماقالت رضوى .... تقريبا من أقصر المواضيع إللي قريتها ....
ولكن
خير الكلام .... ما قل ... ودل...

جميل ياهوبا
وأحلى حاجة فيه إنك كأنك بتدوسي في كل واحد مننا زرار بلاي جوه عقله وتسيبيه ...يشغل بقى شريط عمره كله قدامه ... ويشوف فعلاً من ساعة ما جه الدنيا دي عمل إيه لحد دلوقت ..؟ ولو مات وإتسأل السؤال ده هيرد يقول إيه؟؟

وأسلوبك ما شاء الله ... برغم بساطة الموضوع جدا إلا إنك روعته في بساطته ...شوية كلام صغننين يثيروا في العقل كل التساؤلات والأفكار دي ... إيجااااز مالهوش حل في كلماتك...

ويارب مش تتأخري بالجديد دايماً علينا ... :)

غير معرف يقول...

بسم الله ما شاء الله بجد رائعةيا هوبة
بجد المختصر المفيد
حاسة انى لو كتبت اي كلمات لن تعبر عن اعجابي بالموضوع بجد اي كلام هيكون ظلم للموضوع
بجد رائعة يا هوبة
ربنا يجزيكى عنا كل خير يارب


HOORELGANAA

إلى متى ؟! يقول...

" فى يوم من الأيام.. صحيت من الأحلام

بصيت لحظة فمرايتى ..وظهرت لية حقيقتى"
وكفى...!!!!!
وكفى....!!!!!
وكفى.....!!!!!

فى يوم...

اتيتى به نكرة..لجهلنا بميعاده..ولغفلتنا عن انتظاره

من الأيام...
الكثيرة..الطويلة..والقصيرة
المارة علينا دون ان توقفنا لحظة...

لحظة تأمل..

لحظة حساب..

ليأتى هذا اليوم بحدث مميز فريد:
ولأول مرة وعلى غير توقع
"صحيت من الأحلام"

فأبصرت
و"بصيت لحظة فمرايتى"

مرآة الظاهر
التى ما إن نظرت فيها
حتى لاحت لى مرأة الباطن
لأرى فى الأولى وش عجوز
وأرى فى الثانية نفس مشوهة الملامح
أدقق فى الملامح التائهة فى المرآتين

"لتظهر لية حقيقتى"

يرفض العقل الواعى التصديق
ويؤثر الهروب من الحقيقة المكشوفة
فلطالما آثر الهروب من الحقائق المرة
واكتفى بمتعة اللحظة السريعة المارة

رفض فصرخ.....
و"صرخت وقلت كابوس"

لتزداد الحقيقة جلائا لا يمكن تكذيبه او الهروب منه أو نعته بالكابوس

"دة يوم مفيهوش هروب على الجبين مكتوب"
فتصارح النفس الأنا بالحقيقة الواقعة

"الشباب مهما طال... مسيره فيوم ينتهى"

ينتهى... ينتهى .. أسينتهى؟!!

تأثير هز الكيان وكشف عن أصل المعانى
لتهتز بقوة مقلتى وكأنما تبدلتا بأخريتان
فأنظر فى المرآة مرة أخرى..

أفاجأ بصورة أخرى تتلألأ فى المرآه!!

صورة شاب طموح عابد عامل سعيد واقعى
وتنجلى صورتى الشابة بجانبه
فقد عاد الشباااااااااااااب

" والحكاية بتبتدى"
" والحكاية بتبتدى"

لكنها بداية جديدة

فى طريق طوييييييل
سراجه جملة مرمرية
"العجز فالانتظار"
فلن ننسى -او نتناسى- تلك المرة
أن العجز فالانتظار
سأحاسب نفسى عما سبق

"عملت ايه ياترى.. ضاع شبابك فايه؟
حتقول فات ومضى.. ولا هتفرح بيه؟"

وستثمر هذه التساؤلات عن عمل دئوب وجاااااااااد
عن أذن صاغية وقلوب واعية
ف .. "اسمعلى ككلمتين"

وساعتها هينفعونى

شبابى مش هزار دة أمل امى وابويا

هيشوفوا فية فرحة معاشوهاش

أنجح ونجاحى يغطى الشمس وقت الكسوف

وكيف لا...وقد غاصت كلماتك فى الأعماق

وحفرت فى تربة نفسى ذاك المعنى البراق
"شبابك مسئولية"

فأعش على السؤال
هعمل فيها ايه؟
حقضيها نووووووم؟؟!!!!!!!!


لااااااااااااااااااااااااااااااااا وألف لاااااااااااااااااااا

حفرح بيه

بعدما ذكرتينى
أنى يوم القيامة
حتحاسب عليه...
حتحاسب عليه....

..............


تألقتى
وأبدعتى
حقا السهل الممتنع
اقرأ البداية وأوقن بكفايتها
أقرأ النهاية وإن لم أقرأ غيرها لكفت
أقرأ القلب واللب
فيعزز معنى الفاتحة
ويقود لمعنى الخاتمة
وكل دة فسطرين تلاتة

مبدعة أنت هبة
وما سطرتى كان لى خير هبة
انظرى كيف تزاحمت السطور
لتعبر عن عمق معنى وشعور
سيق فى اختصار واقتصار وليس قصور

خلاصةً
خير الكلام ما قل ودل
وكلماتك فعلتهما معا وأضافت...

أضافت فوق الاشارة بالدليل..

العمق والتأثير..

والحث على عمل بلا فتور أو تأجيل..

قمة البساطة والسهولة
مع قمة العفوية الواقعية الرقيقة القاسية

كلمات تقال كثيرا
وانما جمعت وسطرت منك فى ترتيب عجيب
بتعبير ممتنع شديد رهيب
هو السهل الممتنع لا خلاف

ولا خلاف أيضاً على انتظارنا للمزيد من الابداع الفريد

ابدعى لنستمتع..
ابدعى لنتأثر..
ابدعى لنعمل..
ابدعى لنتغير..
ابدعى ليبتسم الإبداع........

roro يقول...

بجد جميلة اوى ومعبرة فعلا الصورة
واسلوب جميل ومعبر زى معودتنا
فى تقدم مستمر ماشاء الله عليكى
والفكرة جديدة انك تنبهى او تلفتى نظر حد بس مش بعنف لا باسلوب جميل

انسان غامض يقول...

no comment
كلمات ياريتنا نخليها دايما فى عنينا و نفتكرها دايما